Bás an Cholúir



Chonnaic mé bás ar an mbóthar inné. Don chéad uair i mo shaol. Ní fear, ní bean, ní páiste a bhí marbh, áfach, buíochas le Dia. Ní hea ach colúr simplí neamhurchóideach.

Bhí mé ag tiomáint liom féin ar Bhóthar Cowbridge Thoir i gCaerdydd (‘Cardiff’) na Breataine Bige. Bhí mo thriall siar – bhí mé ag dul go dtí Crosaire Culverhouse.

Shrois mé Páirc Victoria. Shrois mé an timpeallán. Bhí orm stopadh seal. Bhí colúr ag siúl ar an mbóthar. Bhí sé ar thaobh na siopaí den timpeallan. Siúl na gcolúr aige. Fiar-dheis. Fiar-chlé. Fiar-dheis. Fiar-chlé. Cuma chaillte neamhchinnte.

Tháing gluaisteán an bóthar aniar. An tiománaí ag iarraidh casadh fá dheis i dtreo Landsdowne Road. Ag gluaiseacht go mall réidh. An colúr aonair sa tslí roimhe. Fiar-dheis. Fiar-chlé. Mearbhall air. Cheap mé go bhfeicfeadh mé an t-éaló coitianta. Beidh sé ag eitilt suas roimh theacht don ghluaisteán. Níor eitil.

Lean sé leis ag siúil go faiteach. Fiar-dheis. Fiar-chlé. Mo léan. Bhí sé díreach sa tslí roimh rotha clé an ghluaisteáin. Ní raibh seans aige. Plimp! Plad! D’imigh an gluaisteán fá dheis agus síos Bóthar Landsdowne. Taobh thiar de ar an mbóthar bhí cnap ciúin liath. Sciathán amháin ag crith. Fuil le feiscint. An ceann, a tháinig slán as an dtimpist, ag gobadh amach go truamhéileach.Bhí mé ag smaoineamh go stopfainn.

Tháinig gluaisteán eile. Sa treo céanna. Sa tslí chéanna. Ar an rian céanna. Ar an gcolúr céanna. Anois bhí an cnap liath go hiomlán brúite. Ní raibh an sciáthán ag crith. Ní raibh an ceann cruinn ag gobadh amach níos mó. Bhí beatha an éin scriosta.

D’imigh mé siar liom féin. Nuair a tháinig mé ar ais, ochtó nóiméad níos déanaí, ní raibh le feiscint i lár an bhóthair ach cleití brúite. Beidh cuimhne agam go deo ar an gcolúr sin.

Scríofa ag Barry Tobin.



Grianghraf: Colúr sa bhearna baoil i gCaerdydd / Cardiff.

Dán (sa Bhreatnais maille le haistriúchán sa Bhéarla) faoi Cholúir i gCaerdydd.

Nascanna don Ghaeilge / Links to Irish / Gorgysylltiadau i’r Wyddeleg.

The Natural World

Leathanach Baile